7 - ம் வகுப்பு அறிவியல் - தாவரங்கள் மற்றும் விலங்குகள் சுவாசித்தல்

தாவரங்கள் மற்றும் விலங்குகள் சுவாசித்தல்

சுவாசித்தலின் அவசியம்

• நாம் உண்ணும் உணவு சுவாசித்தலின் போது உயிர்வளியுடன் (ஆக்ஸிஜனுடன்) இணைந்து வேதியியல் மாற்றம் அடைந்து ஆற்றலாக வெளிப்படுகிறது
• சுவாசித்தலின் போது உயிர்வளி நுரையீரலுக்கு கடத்தப்பட்டு இரத்தத்துடன் கலக்கிறது
• உயர்வளி கலந்த இரத்தம் உடலின் அனைத்து பகுதிகளுக்கும் சென்று அங்குள்ள அனைத்து செல்களுக்கும் சென்றடைகிறது
• உயிர்வளி செல்களின் உள்ளே சென்றடையும் பொழுது சக்தி பொருள் எரிக்கப்படுகிறது. இது ஆக்சிஜனேற்றம் அடைதல் எனப்படும்
• ஆக்சிஜனேற்றம் அடையும் பொழுது நீர் மற்றும் கரியமில வாயு கழிவுப்பொருளாக செல்லில் இருந்து வெளியேற்றப்பட்டு உயிர்வளியால் ஆற்றல் வெளிக்கொண்டு வரப்படுகிறது. இது  சுவாசித்தல் அல்லது செல் சுவாசித்தல் எனப்படும்

சுவாசித்தலின் வகைகள்

1.காற்றுச் சுவாசம்

2.காற்றில்லாச் சுவாசம் (நொதித்தல்)

1.காற்றுச் சுவாசம்

• உயிர்வளியின் முன்னிலையில் நடைபெறும் சுவாசம் காற்றுச் சுவாசம் எனப்படும்

குளுக்கோஸ் + உயிர்வளி  —> கரியமில வாயு + நீர் + ஆற்றல்

2.காற்றில்லாச் சுவாசம்

• சில நுண்ணுயிர்கள், ஈஸ்ட், பாக்டீரியா போன்றவை உயிர்வளி அற்ற நிலையில் உணவிலிருந்து ஆற்றலைப் பெறுகின்றன. எனவே உயிர்வளி அற்ற நிலையில் நடைபெறும் சுவாசம் காற்றில்லாச் சுவாசம் எனப்படும். நம் எலும்புத் தசைகளில் காற்றில்லாச் சுவாசம் நடைபெறுகிறது

குளுக்கோஸ்  —> எத்தில் ஆல்கஹால் + கரியமில வாயு + ஆற்றல்

• பாக்டீரியா மற்றும் பூஞ்சைகள் காற்றில்லா முறையில் சுவாசிப்பதால் சர்க்கரையை ஆல்கஹாலாக மாற்றுகின்றன
• ஈஸ்ட் என்பது ஒரு செல் பூஞ்சை ஆகும். இது காற்றில்லா சூழ்நிலையில் சுவாசித்து ஆல்கஹாலை உற்பத்தி செய்கிறது. எனவே இது மதுபான தயாரிப்பில் பயன்படுகிறது

மனித சுவாசம்

• மனித சுவாச மண்டலம் மூக்கு, நாசியறை, மூச்சுக் குழல், மூச்சுக் கிளைக்குழாய் மற்றும் நுரையீரலை உள்ளடக்கியது ஆகும்
• மார்பறையின் உள்ளே ஓர் இணை நுரையீரல் காணப்படுகிறது
• மார்பறையில் மார்புத் தசைகள் காணப்படுகிறது. இவற்றின் மூலமாகவே நாம் சுவாசிக்கிறோம்
• விலா எலும்புக் கூட்டுடன் இணைந்திருக்கும் தசைகள் விலா எலும்புக் கூட்டை உட்புறமாகவும் வெளிப்புறமாகவும் இயக்கப் பயன்படுகிறது
• நுரையீரலுக்கு கீழே வலிமையான தட்டையான தசைத்தொகுப்பு காணப்படுகிறது. இது உதரவிதானம் எனப்படும்
• நமது மூக்கில் இரண்டு துவாரங்கள் உள்ளன. இது நாசித்துவாரம் எனப்படும்
• நாசித்துவாரம் நாசிப்பள்ளத்தில் திறந்து மீண்டும் மூச்சுக்குழலில் திறக்கிறது
• மூச்சுக்குழல் இரண்டு மூச்சுக் கிளைக்குழல்களில் பிரிகிறது
• ஒவ்வொரு மூச்சுக் கிளைக் குழலும் நுரையீரலுக்குள் சென்று அங்கு மேலும் பல கிளைகளாகப் பிரிந்து மூச்சுக் கிளை சிறுகுழலாகி காற்று நுண்ணறையில் முடிவடைகிறது
• நுண்ணறையின் சுவர்களில் இரத்தத் தந்துகிகள் எனப்படும் பல மெல்லிய இரத்தக் குழாய்கள் காணப்படுகின்றன
• நுரையீரலுக்குள் செல்லும் உயிர்வளி இரத்தத்தில் கலக்கிறது
• இரத்தத்தில் உள்ள கார்பன் டை ஆக்சைடு நுரையீரலுக்குள் உள்ள நுண்ணறையில் வந்து சேர்கிறது
• காற்று உள்ளிழுத்தல் மற்றும் வெளியேற்றல் நிகழ்ச்சியே மூச்சு விடுதல் எனப்படும். இது ஒரு தொடர்ச்சியான நிகழ்வு ஆகும். இதுஒரு உயிரினத்தின் வாழ்நாள் முழுவதும் அனைத்து நேரங்களிலும் நடைபெறும் நிகழ்ச்சி ஆகும்

விலங்குகளில் சுவாசம்

• ஒரு செல் மற்றும் பல செல்கள் கொண்ட சிறு விலங்குகளின் செல்கள் அனைத்தும் சுற்றுப்புறத்தில் உள்ள காற்று அல்லது நீரிலிருந்து உயிர்வளியை எடுத்துக் கொண்டு கரியமில வாயுவைப் பரவல் முறையில் வெளியேற்றுகின்றன
• எடுத்துக்காட்டு
• அமீபா, பாரமீசியம்
• மண்புழு மற்றும் அட்டைப் புழுக்கள், ஈரப்பதம் மற்றும் வழவழப்பான தன்மை கொண்ட தோலின் மூலமாக சுவாசிக்கின்றன
• தவளை போன்ற விலங்குகள் தோல் மற்றும் நுரையீரல் மூலம் சுவாசிக்கின்றன
• மீன்கள் செவுள்கள் எனப்படும் சிறப்பு உறுப்புகள் மூலம் நீரில் கரைந்துள்ள உயிர் வளியை உறிஞ்சி சுவாசிக்கின்றன
• ஊர்வன, பறப்பன மற்றும் பாலூட்டிகள் நுரையீரல் மூலம் சுவாசிக்கின்றன
• விலங்குகளான பூச்சிகளில் பல சிறு துளைகள் காணப்படும். அவை காற்று துளைகள் எனப்படும். இந்த காற்று துளைகள் மூச்சுக்குழாயில் முடிவடைகிறது. வாயுப்பரிமாற்றம் இந்த காற்று துளைகள் மூலம் நடைபெறுகிறது

தாவரங்களில் சுவாசம்

• தாவரங்கள் இலைகளில் உள்ள சிறு துளைகள் மூலம் சுவாசிக்கின்றன. இவை இலைத்துளைகள் எனப்படும்
• தண்டுகளிலும் சிறு துளைகள் காணப்படுகின்றன. இத்துளைகளும் வாயுப் பரிமாற்றத்திற்கு உதவுகின்றன
• வேர்களும் தனியே சுவாசிக்கின்றன. மண் துகள்களுக்கிடையே உள்ள காற்றறைகளில் உள்ள காற்றை வேர்கள் சுவாசிக்கின்றன